برنامج لحجز الرحلات في جزيرة بوركاي
اليوم في بوركاي جربت برنامج عالايفون اسمه GetYourGuide
يعطيك رحلات سياحية في وجهات مختلفه حول العالم وتقدر تحجز الرحلة ويعطيك تفاصيل الرحلة السياحية ووصف دقيق لها وش تحتاج تجيب معك وايضا وش الانشطة اللي راح تسويها
ميزته تدفع بـ applepay وتتوجه للموقع المتفق عليه
جربت اليوم رحلة الغروب مع انشطة مائية
Sunset Cruise with water activists
لها وقتين الرحلة الساعة ٣ او ٤ انا اخترت ٤ عشان يتوافق مع غروب الشمس والمنظر الحلو
يواعدونك في مكان اسمه bulabog beach
تقدر تروح له من خلال التيك توك بـ ١٥٠ بيسو او تخلي فندقك يوصلك هناك اذا متوفر عندهم كذا
ياخذونك لمدة ساعتين ونص مع قروب
تروح لمكان مناسب للسباحة والغوص ونظيف جدا وصفاوة الماء فيه حلوه وفيه قوارب 🚣♂️ تستخدمها ويجيبون في البوت واحد يعزف بغيتار ويغني لكم 😂
ساعة كامله سباحة وغوص وقوارب تجديف صراحة متعة وانتعاش ما تمل منه ابد
بعد كذا تطلعون لمكان مناسب عشان تشوفون الغروب وتصور وتتمشى في البوت ع راحتك
صراحة تجربة حلوة مره
يرجعونك الساعة ٦:٣٠
بعدها
تاخذ تيك توك ١٥٠ بيسو وعالفندق تروح
مهم جدا تاخذ معك مويه عشان مايوفرون في البوت مويه ولا يبيعون
وتاخذ منشفة واكيد ملابس سباحة
كل هذا تقريبا ١٧ دولار
يعني حول ٦٤ ريال
ما ادري عن سعر الرحلة نفسها برا البرنامج عن طريق اللي يسوقون للرحلات في الجزيرة ولكن اعتقد سعر مناسب
وانا اساسا احب الشي اللي اقدر استخدم فيه التقنية وما احتاج اتعامل مع اشخاص غير موثوقين او قد يرفعون عليك السعر
