تقرير رحلتي الى جورجيا بالتفصيل مع كل شيئ

هذا تقرير رحلتي الى جورجيا سويته بناء على طلب وسؤال الكثير ،  قلت اسوي هذا التقرير تستفيدون منه في التخطيط لرحلاتكم وبيكون شامل السكن والأماكن اللي زرتها وبعض الصور ان شاء الله وأعلمكم بالأخطاء اللي سويتها عشان تتجنبوها

وأتمنى يفيدكم ويكون مرجع للمسافرين .
انا زرت جورجيا مرتين، السنة الماضية في شهر اوقست والسنة 2023 هذي في نهاية جون الى بداية جولاي، فا بحاول ادمج لكم هذي الرحلتين واعطيكم الخلاصة والمفيد منهم كلهم.

الأخطاء التي ارتكبتها :

• اول غلطة ارتكبتها في السفرة الأولى اني حجزت الذهاب والعودة إلى ومن تبليسي.
• والأنسب والأفضل ان الذهاب يكون الى تبليسي والعودة من باتومي او العكس ما في فرق ولكن المهم مطارين مختلفة عشان يكون خط السير في اتجاه واحد.
• وهذا اللي سويته في السفرة الثانية وكان افضل وأريح بكثير.

بخصوص تقسيم المدن:

• يعتمد عليكم وعلى ايش تحبون .
• شوفوا طقس كل مدينة وفعالياتها وحددوا.
• العاصمة تبليسي في الصيف حدها يوم اذا مره مره يومين اكثر من كذا لا تقعدون لان جوها ما يساعد .

نبدأ بسم الله

• اول شيء بخصوص التنقل انا في كل المرتين استأجرت سيارة لأننا عائلة وأفضل لنا اننا نتنقل براحتنا وبخصوصية وبدون إزعاج.
• وفي كل المرتين اخذت السيارة من هذا الموقع اضغط هنا يفتح لك الموقع اسعارهم ممتازة وتعاملهم ممتاز وتجربتي معاهم رائعة، أوصي فيهم بشدة و الأهم شركات عالمية بتعاون مع موقع بوكينق سياراتهم و شغلهم نظيف .
• السفرة الأولى كنا ٤ اشخاص ف اخذنا تويوتا بريوس ب ٣٥ دولار اليوم، والسفرة الثانية ٥ اشخاص ف احتجنا سيارة أوسع واخذنا النترا ب ٤٠ دولار اليوم والسيارات جديدة ونظيفة ما شاء الله واخذت تأمين شامل طبعًا.
• بخصوص الرخصة ما يحتاج رخصة دولية، الرخصة السعودية هناك تترجم الى جورجية وخلاص .

تبليسي:
المرة الأولى : سكنت في

فندق sole palace

• فندق جميل ونظيف جدا واطلالته رائعة .
• الخدمة على مستوى راقي جدا .
• به شطافه بالحمام .
• الإفطار بجوده عالية .
• الموظفين متعاونين وراقيين وابتسامتهم تكفى صراحه .
• انصح به للزيارات الشخصية مع الأصدقاء والعائلة .

•  الهدوء والنظافة والحرص الى العميل والسيارة توصل لحد المكان لانه في طلوع .
• قريب له الشلال والكافيات والمطاعم مشي توصل لها .

• اخذت غرفتين ل ٤ اشخاص لمدة يوم واحد ب ٣٨٨ لاري ودفعت عن طريق بوكينق من اول ما حجزت لان ما كان عندهم دفع عند الوصول.
• الفندق حلو وصغير وملموم ومرتب ونظيف وفيه شطاف وموقعه حلو
• لكنه مرتفع شويه فا اذا انتوا ناس تبغون تروحون وتجون مشي اعتقد الطلوع له بيكون متعب، احنا كان معانا سيارة ف امورنا تمام.

المرة الثانية : سكنت في

فندق Reed Hotel Tbilisi

• الفندق مره حلو وفطورهم حلو والاطلالة وقت الفطور تجنن.
• اخذت سويت غرفتين وصالة لكن الغرف ما فيها مكيفات فقط في الصالة بس كان يبرد كل الغرف صراحة والجو كان مره حلو بس قلت اذكر هذي النقطة لان فيه ناس يفرق معاها ولان يعتمد وقت سفرتكم اذا حر مره وتبغون مكيف .
• هذي الاطلالة من فوق وقت الفطور والمطعم نفسه عندهم غداء وعشاء في أوقات معينة، ما صورت الاطلالة من شباك الغرفة مع انها حلوة لكن كان الجو شمس في تبليسي.

العاصمة تبليسي

• زرت جسر السلام .
• وطلعت التلفريك حلو مره  يستأهل التجربة، تشوفون تبليسي من فوق مره المنظر رائع .
• وفيه كشكات يبيعون سوڤنيرز اللي هي التذكارات وهذي الأشياء .
• وفيه عندهم اكلات خفيفة ومشروبات  وتشوفون تمثال ام الجورجيين وهناك فيه ناس يغنون وفعاليات حلوة للتمشي مره.
• ولو رحتوا يسار فيه حديقة يقولون حلوة وفيها شلالات وفيها زبلاين، بس انا ما رحتها لان الجو كان شمس بشكل لا يحتمل.
• ف عشان كذا انتبهوا لوقت طلعتكم لان الشمس حتنكد عليكم خذو مضلة تساعدكم .
• جربت الايس كريم المشهور عندهم صراحة لذيذ مره عجبنا المرة الأولى ورحنا له في المرة الثانية، عبارة عن زي الخبز كذا مخبوز في الفرن ويطلعونه يحطون عليه سكر وقرفه نفس طعم السينابون، ومن جوا يحشونه فواكه ونوتيلا ويحطون من فوق ايس كريم ومكسرات اغلى نوع عندهم ب ١١ لاري اللي هو اعتقد اسمه سبيشال لوميرز فيه كل شي ذكرته فوق  Lumier’s Chimney Cake اسم المحل .
• من الأشياء اللي تستحق التجربة كمان القطار الجبلي في ملاهي متاتسميندا مره كانت تجربة حلوة، والملاهي نفسها مرتفعة ف حلو المنظر من فوق، بخصوص الألعاب ما لعبت ولا شفتها صراحة حسيت المكان هادي يعني حقها القطار والمنظر بس وكان فيه مسرح مشغلين أغاني والأطفال مبسوطين ويرقصون ومره كانت أجواء حلوة.

بخصوص القطار الجبلي :

• اشوف افضل انكم تطلعونه من تحت وهو يطلعكم على الملاهي تتمشون فيها وترجعون بالقطار لتحت هذا الموقع اذا بتطلعون القطار من تحت:
  https://maps.app.goo.gl/faCGFpM7EVeVZG2Y8?g_st=it

كمان رحت kvarts coffee :

• اللي يرسمون الوجه على الكوب اخذت فلات وايت ب ٩ لاري والرسم على الكوب مجاني، قهوتهم حلوة .
• وصراحة البنت اللي ترسم فنانة رسمتني وكتبت لي اسمي بالجورجي على الكوب ف كانت تجربة حلوة مره لدرجة اني احتفظت بالكوب.

بخصوص المطاعم :

• جربت مطعم ام عبدالرحمن البلوشي حلو اذا وحشكم اكلنا والكبسات وهذي الأشياء
• مطعم burger house اخذت منهم برقر لحم مره لذيذ.
• نكتفي بهذا القدر في تبليسي ولكن للعلم فيه أماكن سياحية كثير ما رحتها ابحثوا عنها وممكن تضيفونها في جدولكم اذا ناسبتكم.

القوقاز:

• نجي للمنطقة الأحب لقلبي والأروع والأجمل في عيني وهي جبال القوقاز لما فيها من طبيعة وأرياف ودرجة حرارة منخفضة.
• في الطريق الى هذه المنطقة الرائعة بتمرون على مناظر أروع في طريقكم لها تقدرون تشوفونها في ملف فعاليات القوقاز اللي موجود في الموقع موجودة كل منطقة بموقعها بالترتيب بحيث انكم تمشون عليها وحدة وحدة في خط سيركم.
• منها بحيرة أنانوري اللي كأنها رسمة سبحان الله

طيب بخصوص السكن في القوقاز

• اول شيء جبال القوقاز ممتدة على منطقتين وهي كازبيجي وغوداوري وبينهم تقريبًا نص ساعة لو سكنتوا في أي وحدة فيهم يتشوفون الطبيعة والارياف وكل شيء ما فيه فرق كبير.
• لكن كازبيجي فيها الاكواخ غالبًا.
• انا في كل المرتين سكنت في كازبيجي .

المرة الأولى قعدت يومين في

فندق Capra hotel

Capra Hotel Kazbegi

• حلو ورايق .
• فيه بلكونه مطله .
• موقعه حلو وقريب من الخدمات سوبرماركت صيدلية وحتى شفت مطاعم لكن ما جربتها

اما المرة الثانية قلت بخلي القوقاز ٤ أيام وبأجرب اسكن في كوخ ووقع الاختيار على

كوخ حجزته من بوكينق (بكينق يضمن حقي في الحجز لو صار ازدحام يرقون حجزي) اسمه

الاكواخ Gergeti woods

• هذا هو الكوخ من برا، هي كوخين جنب بعض ف ممكن لو انتوا اكثر من ٦ اشخاص تاخذونهم الاثنين
• هذا المنظر الرهيب من شباك غرفتي هنا نفس المنظر لكن بعد ما راح الخيل وكان وقت مطر
  وجود الخيل زاده جماااال مره سوا لنا جو صراحة )

• الكوخ عبارة عن غرفتين كل غرفة فيها ٣ اسرة .
• صالة صغيرة كذا فيها طاولة طعام ومطبخ صغير.
• وكان أمام شباك غرفتي منظر مهيب للجبال بعضها خضراء وبعضها يكسوا قممها بياض الثلج كل ما وقعت عيني عليها سبحان الله، هذا غير الخيول والبقر والأنعام اللي تعدي من جنبنا أضافت طابع ريفي جميل للمكان وللأجواء.
• عمومًا كان الكوخ راائع مره توفقت فيه ياربي لك الحمد 
  أغلب الصور أكون قاصتها من مقاطع فيديو ف اعتذر على الجودة( هنا قررت أطلع الجبل قريب من الخيل واكتشفت انه مربوط ف استمتعت بمصاحبته والجلوس بالقرب منه، وكان شعور رائع ومنظر أروع بين أحضان وأصوات الطبيعة، صوت الخيل وصوت جريان ماء الشلال وحتى زخات المطر اللي تسي ر علينا كل نص ساعة! كان مزيج رائع جدًااااا وهنا لقطات مختلفة للغيوم وهي نازلة تسي ر علينا
  بخصوص الأكل طول فترة إقامتنا كنا نطبخ اكلنا بنفسنا معانا عزبة ولحم وكل شي، والدجاج كمان موجود في السوبرماركت حلال تلقون ساديا وشركة ثانيه ناسيه اسمها

• رحت كافيه فندق رومز صراحة اطلالته رائعة وكل الكافيات اللي طلبناها لذيذة، كانت طلباتنا:
  • فلات وايت وايس امريكانو.
  • وايس امريكانو مع ايس كريم.
  • كلهم كانوا حلوين أقيمهم عشره من عشره.
  • اما بخصوص الحلا فيه حلا مره رهيب ما يحضرني اسمه لكنه بالتمر والكراميل وفوقه ايس كريم هذا اعطيه مليون من عشره.
  • ونوعين ثانية كانت تشيز كيك وحلا ثاني بالبستاشيو جيده لا بأس بس هذا التوب.
  • حسابنا كان ٩٦ لاري .
• رحت كمان الى مكان جميل فيه جلسات شواء وذبايح والخيول والغنم حوالينا مره كان جميل أوصي فيه ما اعرف بكم الذبايح عندهم لان احنا رحنا ومعانا لحم ف بس كنا نبغا الجلسة ومنقل وفحم، قلت له ابغا جلسة قال ٥٠ لاري تقعدين فيها اليوم كله، قلت وابغا المنقل والفحم قال زيادة ٥٠ لاري واعطيته النظرة هذي قلت لا غالي قام فتح الحاسبة في جواله وكتب ٨٠ قلت لا واخذت الجوال كتبت ٥٠ قال طيب يلا تمام، هذا السيناريو عشان تعرفون أهمية المكاسرة وكيف انهم يرمون أي سعر في البداية يشوفونكم توافقون ولا لا .
  • هذا موقع المكان :
    https://maps.app.goo.gl/9dvdRN8qKNNyJmyr9?g_st=ic

في طريق عودتنا شفنا هذا الشلال ودخلنا له بالسيارة كان جميل وفي بدايته كان فيه كومة ثلج ما ذاب سبحان الله، وبعدين وانا ادور الموقع لوحدة شفت كاتبين ان فيه كهف ثلجي انا ما انتبهت له بس اذا رحتوا شوفوا له
هذا موقع الشلال :
https://maps.app.goo.gl/MJSgbXUCPPnz1SxK8?g_st=ic

اخر شي لازم أوريكم حقول الأزهار اللي بجانب الكوخ، منظرها رائع وتداخل الألوان بينهم أروع
تقريبًا كذا خلصت من القوقاز لكن فيه شي بأن وه عليه بخصوص تقريري كله مو بس القوقاز، في كل منطقة تروحونها اعرفوا ايش فعالياتها وايش ابرز الأماكن فيها وحددوا ايش يناسبكم، انا فيه أماكن كثير ما رحتها لان اهلي مزاجيين وما يحبون يمشون كثير ومرات
بس يبغون يستمتعون بالمكان والأجواء بدون لفلفه كثير، وفيه أماكن اروحها بس تكون بديهيه ف ما اكتب عنها ولا احط لكم صورها
زي تلفريك القوقاز مثلًا وجسر السلام في تبليسي وهكذا، ف لا تعتمدون اعتماد كلي وخططوا لرحلتكم بنفسكم بعد إطلاعكم على كل شي
……………………

باكورياني و بورجومي :

• في السفرة الأولى سكنت في باكورياني بحكم اني رحت في اوقست وقالوا لي انها أبرد وأفضل وفيها طبيعة اكثر.
• سكنت في فيلا جيجي حجزتها عن طريق بوكينق اخذت جونيور سويت مع إطلالة على الجبل ل ٤ اشخاص لمدة يومين ب ٦٠٧ لاري .
• انا من الصور توقعتها فيلا مستقلة وبحوش مستقل، بس طلع لا دخلت مبنى عادي فيه شقق كل وحدة ببلكونة وقالوا لي غرفتك في الدور الثاني او الثالث والله ناسيه، والدرج طويل :
  • ما في احد يشيل الشنطة ولا فيه مصعد.
  • الغرفة حلوة ونظيفة عبارة عن صالة فيها مطبخ صغير وغرفة نوم ودورة مياه الله يكرمكم.
  • بلكونة حلوة ممتدة من الصالة لغرفة النوم.
  • وفيه درج صغير  يودي لغرفة فوق، ما اسميها غرفة الصدق كذا مساحة ضيقة مره حتى ما اقدر امشي وانا واقفه وفيها سرير بس.
  • عمومًا هي حلوة بس ما اعيد التجربة اقي مها ٦ من ١٠ .

اما بالنسبة لباكورياني عمومًا حلوة وباردة وفيها خضار وطبيعة لكن ما تقارن بالقوقاز، وتقدرون تشوفون فعالياتها في المدونة .
وبورجومي زرتها من باكورياني وعجبتنا حسيت فيها حياة وفعالياتها كثير وفيها ناس وسنتر لكن كان الجو حر شويه وشمس
ورحت حديقة بورجومي حلوة وفيها شلال ونهر ومناظر حلوة وفيها ألعاب بسيطة للأطفال.

في السفرة الثانية :

تأكدت على طقس بورجومي وشفته حلو وامطار وقررت اسكن فيها كتغيير، سكنت في فيلا اسمه ا Riverside borjomi مطله على النهر، وموقعها جدًا ممتاز قريب من كل شيء سوبرماركت وصيدلية ويمديكم تروحون لمطعم maharajah الهندي مشي، مره المكان حلو وحلو ان كل شي اقدر أوصل له مشي، الفيلا حجزتها من بوكينق ب ٧٠٠ لاري لمدة يومين، 
الفيلا عبارة عن دورين، الدور الأول فيه مطبخ متكامل وطاولة طعام ودورة مياه الله يكرمكم فيها غسالة ملابس وصالة فيها كنبتين
تصير سرير وتلفزيون فيه يوتيوب ونتفليكس وكل شي، وشباك كبيييير جدًا مطل على زي الحديقة برا معطي شراحة للمكان، اما الدور
الثاني فيه دورة مياه الله يكرمكم غرفتين نوم كل غرفة لشخصين مع بلكونة مطلة على الحديقة والنهر وكل غرفة فيها تلفزيون برضو فيه
يوتيوب ونتفليكس، مره صراحة الفيلا شرحه ومريحة اهلي انبسطوا فيها وكانوا يبغون نمدد يوم زيادة، لكن معلومة ممكن تهم البعض
الفيلا مافيها مكيفات ووقت روحتي كان الجو بارد جدًا درجة الحرارة تنخفض الى ١٠ ف ما احتجنا أبدًا، لكن عمومًا أوصي فيها
بشددددة لانها نظيفة جدًا وموفره كل شي يعني شغل خدمات فندقية سواء سليبرز او فرش الاسنان او المناشف كل شي موفرته واذا
طلبناها شي تجيبه بكل صدر رحب مره ما قصرت معانا.
هذي الاطلالة من البلكونة )ما يحتاج اكرر ان اغلب الصور هنا من مقاطع ف الجودة مو مره تمام(
وهذي صورتها وانا اتمشى في الجوار
اليوم الثاني الصباح فتحت قوقل ماب اشوف مكان قريب نفطر فيه ولقيت كافي صغير ملموم يبعد ٥ دقايق مشي اسمه cafe Iggy
واتجهنا له وعشان نوصل له لازم نعبر الجسر، وكان في طريقنا أصحاب الدبابات يعرضون عليكم جولات سياحية ورحلات والى اخره
وصلنا وجلسنا في الجلسات الخارجية كان المكان حلو وبسيط وأكلهم كله لذيذ جدًا
هنا إلتقاطه أثناء عبور الجسر وصورة من الكافي وطلباتنا واسعارها
رحت حديقة بورجومي كمان مره حلوة زي ما قلت لكم وفيها نهار وشلال ومناظر طبيعية حلوة وفيها مشي كثير
……………………

باتومي:

• مدينة الحياة والناس والفعاليات والأغاني مدينة حيه جدًا، أسميها عروس البحر الأسود زي ما جدة عروس البحر الأحمر.
• في المرة الأولى سكنت في شقة dadu كانت حلوة وواسعة ونظيفة غرفتين وصالة، ويملك المكان عائلة زي العسل وتعتبر قريبة من كل شي اخذتها ب ٣٠٠ لاري لليوم الواحد .
• المرة الثانية سكنت في أروع وأروق وأفخم فندق وهو

alliance palace

جدًا جميل واطلالته على البحر، في البداية حجزت سويت
عائلي غرفتين وصالة من بوكينق الاوتيل خمسة نجوم وأوصي به بشدة هذي الاطلالة من البلكونة على البوليفارد والنافورة الراقصة وعلى الجمال كله، المنظر رائع في الليل وفي النهار

زرت الحديقة النباتية وكانت رااائعة جدًا بس اختاروا وقت مناسب ما يكون شمس، الدخول ب ٢٠ لاري للشخص وملاحظة مهمه الحديقة فيها مشي كثير ومرتفعة ف الوضع كأنه هايكينق شويه بس اذا ماشين على رواق وتتفرجون في النباتات وانواعها صراحة متعه، وكاتبين على الأشجار من فين اصلها فيه من استراليا ومن اليابان من أمريكا الشمالية وغيرها كثير، المكان حلو وتحسون الهواء نظيف ومنعش وفيه إطلالة رائعة على البحر .

وأروع شي كان الزبلاين مره كان حلو خصوصًا انه على البحر كان يجنن مره، سعر الشخص ٧٠ لاري وفيه دفع كاش وبالبطاقة
ومكانه مرتفع شويه وفيه قولف كار اذا حابين، ماعندي خلفية عن أسعارها لان ما طلعتها.

اول ما تشترون التذاكر يعطونكم معاها خريطة للحديقة وهنا بعض اللقطات لهذه الحديقة الرائعة، في ثاني صورة تقدرون تشوفون امتداد حبل الزبلاين .

وطبعًا رحت البوليفارد وعلي ونينو وهذي الأشياء المعروفة )تذكروا اني ما حركز على كل شيء(
وطلعت برج الحروف الاطلالة من فوق حلوووة مره، واكلنا في المطعم بصراحة اكله عادي وسعره غالي بس الاطلالة حلوة.
زرت شلال ميرڤيتي حلو مره بس مكانه ضيق وصغير اللي توقفون عنده خمسة دقايق تتفرجون وتصورون وتمشون، الطريق له ممتع
جدًاااااا جدًا والسيارة ما توصل عند الشلال مباشرة بتوقفون بعيد شويه وتروحون مشي مسافة ف ما اشوف ينفع لكبار السن، بس
الأطفال عادي كان فيه أطفال كثير وبعضهم يسبحون كمان.
شلال ماخونسيتي أيضًا حلو والزبلاين اللي فيه حلو مره وممتع ما يحضرني سعره صراحة لاني رحته السنة الماضية بس اعتقد ٧٠
لاري، وفيه زبلاين للأطفال وفيه تجديف، وبعد ما خلصنا واحنا راجعين على باتومي لقينا مكان حلوة الجلسة فيه على النهر وجلسنا
طبخنا وتغدينا هناك وكانت جلسة رااائعة جدًا.

في باتومي انصح بزيارة كوفي Dona مخبوزاتهم وحلاهم رهيبين جدًا ومتنوعه بشكل كبير حتى حلا بدون سكر عندهم، ومنيو القهاوي عندهم محدود اسبريسو وامريكانو وقهوة تركيا وهوت تشوكلت وناسيه الباقي بس كذا أشياء بسيطة واسعاره تعتبر رخيصة وممتازة مره انصح فيه.

وأيضا انصح بمطعم Fishlandia مطعم بحري رحته بناء على توصيات القروب، قبل المطعم رحنا سوق السمك اشترينا بنفسنا لان الوالد إنتقائي جدًا بعدها رحنا للمطعم وحددنا لهم ايش اللي نبغاه شوي وايش اللي قلي وطبخوه لنا، يطبخون كيلو السمك ب ٦ لاري والجمبري الحبة ب ١ لاري، وعندهم برضو سمك اذا حابين بدون ما تروحون السوق.

كذا تقريبًا انتهيت :

حاولت اذكر لكم كل شيء اتذكره وحسيته مهم سواء من معلومة او صور وغيرها، ستلاحظون ان فيه أماكن كثير ما ذكرتها وهذا لسببين، يا اني ما رحتها يا اني رحتها ولكن لا نها مألوفة وتعتبر معالم رئيسية ما ذكرتها تقليلًا للكلام وللجهد، ومعيش لان على الأخير بدأت اتعب واختصر.

نصيحتي الوحيدة لكم

هي ان كل المعلومات وكل شيء تحتاجونه بين ايديكم طالما انك عزيزي القارئ تمتلك جوال في يدك ف وصولك لكل المعلومات والتفاصيل اسهل من أي شيء، ف خططوا لكل شيء واسألوا واستفسروا قبل ما تتخذون أي خطوة .
شكرًا لوصولكم الى هذا السطر، أتمنى ان تقريري الطويل قليلًا فادكم في التخطيط والتجهيز لرحلتكم ويارب تكون جميع رحلاتكم سهله

ميسره سعيدة