تقرير رحلتي باتومي جورجيا لمدة اسبوع

تقرير رحلتي لـ باتومي

المدة : أسبوع من 4 يوليو الى 11 يوليو
ما خرجت وسكنت خارج باتومي نهائي طول الأسبوع لأن معي كبار سن ما حبيت اتعبهم بالخطوط، لكن اصدقكم القول المدة طويلة على باتومي فقط مع انها جميلة جدا..

السكن : اول 4 أيام اخذتها عن طريق Airbnb شقة داخل مبنى الآوربي سيتي (المدخل المجاور لفندق سكاي تاورز)
https://ar.airbnb.com/rooms/648292364162496039?source_impression_id=p3_1689109796_AzXU%2Fpmlm9hGTHfU

تكلمت عنها قبل انها جميلة ونظيفة وسعرها معقول غرفتين وصالة واطلالة كاملة على البحر مقابل 500 ريال لكن مثل ما ذكرت قبل كم يوم لو عاد بي الزمن ماراح اختارها بسبب زحمة المصاعد الفظيعة والمواقف، والله ما ابالغ اذا قلت لكم اليوم الأخير احتجنا اكثر من نصف ساعة عشان ننزل + ما فيه شطاف واعرف ان هذي نقطة تهم الكثير..

راعية الشقة جدا متعاونة وتسجيل الدخول والخروج بدون ما أقابل اي شخص اطلاقا..

بعدها غيرت السكن لفندق قريب من موقع الفندق وهو

Hotel Corner Inn

غرفتين مطلة على البحر مع افطار مقابل 600 ريال لليلة ” الافضل دائما تحجز عبر موقع بوكينق لضمان أفضل خدمة و هم يحمونك بعد الله لو صار فية مشكلة في الحجز او مافي حجز ”
الفندق ما هو فخم مره وفطورهم جدا متواضع لكن حسن تعامل الموظفين وطيبتهم تحببك بالفندق غصب + مكانه ممتاز قريب للساحل والحديقة المائية + فيه شطاف..

التنقلات :

استأجرت سيارة ميني ڨان عن طريق موقع City Rent Car اليوم بـ 80 دولار لكن صلخوني بوديعة 1400 لاري، بالاستلام مندوبهم تأخر علي 40 دقيقة لكن بالتسليم كانوا بالموعد بالضبط، لما سلمتهم السيارة ما اعجب مندوبهم ان تكرمون الوطايات كانت رطبة قلت له تمطر الأجواء وش ممكن اسوي؟ صنف السيارة انها غير نظيفة والله يستر على وديعتنا اللي للآن ما رجعت..
انا قررت اسوق بنفسي على اساس ابشتري راحت بالي وياخذون راحتهم الأهل لعله صار هذا فعلا لكن انا انشغلت بالدوران وتدوير المواقف، الديرة جدا جدا مزدحمة لكن قيادتهم حلوه ومحترمين لدرجة لا توصف..
اغلب من قابلت من شعبهم طيب جدا، ما يفكر يكلمك لو ما قلت له شيء ولو كلمته وجدعت عليه كلمة وحدة مثل اهلا بالجورجي او شيء ينبسط ويبدأ يحاول يسولف وياخذ ويعطي معك..

الديرة ما هي رخيصة وما هي غالية جدا أصنفها متوسطة..
نقطة اخيرة للموضوع المتكرر بالقروب بخصوص التأمين؛ استغرب انه يكون سالفة ونقاش يفتح كل يوم .. ياخي الأغلب عنده حساب بـ يورباي ادخل رابط فيزا الموجود بالقروب ودخل فيزتك حقت يورباي واطبع تأمينك مجاني .. ولو ما عندك حساب بيورباي افتح ماراح يضرك هذا اللي انا سويته مع الاهل عدد 6 اشخاص والامور مشت الحمد لله بالسليم..