جزيرة الجبيل ( أبوظبي)

1. الموقع حديقة جبيل في مواقف خاصة لزوار پِورا سواء زوار المطعم “شاي بعد الظهر او عشاء”. ياخذونكم بسيارة الجولف الرحلة تقريبا ١٠ دقايق (حول ال٣ كيلو) .

2. الغرف: عبارة عن خمس قبب مسوينها بشكل دائري نفس بيت الثلج. وعازلين مكان القبب بساق البامبو عن زوار المطعم.

3. الحد المسموح: كل قبة مسموح شخصين بالكثير وممنوع الاطفال.

4. التسهيلات: سرير كبير وكرسيين وطاولة داخل لكل قبة حمام خاص متصل مثل منعزل عن الخارج مع فوط وروب و متوفر داخل مكينة النسبريسو، غلاية ماي، سشوار، خزنة صغيرة وبرا في جلسة مظللة وكرسيين وطاولة و مكان لشب الضو، و يوفرون عدة الشوي هذا ما عرفت عنه الا متاخر (بتكون فكرة حلوة ان تشوون،)

5. النظافة: المكان نظيف والحمام نظيف.

6. الخصوصية : قبة رقم ١ الى ٥ اكثر اثنين منعزلين لكن قبة رقم ٤ رائعة موقعها اكثر خصوصية  , القبة رقم 3 حلو للغروب بعد قبة رقم ٢ اللي مب برايفت وايد. و من تجربتي الشخصية الكل يروح هناك يكونون بروحهم و منعزلين يا مجموعة بنات او زوجين و في هالحالة راح تلقونهم هم اللي يسكرون ستارتهم دوم ف ماراح تفرق معاكم.

7. الانشطة : يوفرون مع كل قبة تلسكوب و منظار و ايضا يوجد دراجات هوائية. واذا حابين كياك متوفر في الحديقة يعني ترجعون موقع الباركنج.

8. التصوير: المكان حلو للتصوير ، و وقت السقي “المد” الطريق للمكان يكون حوله ماء.

9. الشروق لازم تطلعون برا مكان القبب عشان تشوفون الشمس تشرق حلو المنظر وتستحق الطلعة، والغروب تشوفونه اذا طلعتوا برا القبة. وطبعا بما ان هذا موسم الفلامنجو 🦩 تقدرون تشوفونهم بالمنظار او العين المجردة.

10. السعر: القبة الوحدة ٢٠٠٠ درهم مع الريوق…