نبذة مختصرة عن زيارتي لدولة تايلاند

السلام عليكم .. اتمنى للجميع رحلة ممتعة
بحاول اعطيكم نبذة مختصرة عن زيارتي لدولة تايلاند و أتمنى أنها تفيد الجميع..

خطتي كانت عبارة عن ٢٥ يوم
٤ أيام كرابي
٧ أيام بوكيت
٧ أيام شيانج ماي ( كنسلتها بعد رابع يوم )
٧ أيام بانكوك ( صارت ١٠ ايام بعد ما كنسلت شيانج ماي )

كرابي ( ٤ أيام )
كرابي مدينة هادئة و السياح فيها أقل من بوكيت و أشوفها أفضل و أرخص من بوكيت من ناحية الرحلات البحرية لأن بعض الجزر اقرب لكرابي اكثر من بوكيت.

بوكيت ( ٧ أيام )
بوكيت تعتبر الأغلى و أكثر السياح العرب و الاجانب فيها .. وفيها أغلب الفعاليات.

شيانج ماي ( ٤ أيام )
هي الأرخص بينهم و يميزها جوها اللي يعتبر ابرد ( بقليل ) من باقي مدن و جزر تايلاند و تعتبر ثاني اكبر مدينة في تايلاند و لهذا السبب اعطيتها ٧ ايام في الخطة لكن للأسف ألغيت حجز الفندق في اليوم الرابع و أخذت باص الى بانكوك .. لأن شيانج ماي تعتبر تاريخية اغلبها معابد و أغلب فعاليتها برا المدينة من ٢٠ الى ٥٠ كيلو .. عن نفسي ما اشوفها تستحق احد يزورها للأمانه الا للي مهتمين بالتاريخ .. و اللي حاب يزورها أنصحه بالسكن قريب من فندق لي ميرديان.

بانكوك (صارت ١٠ أيام بعد ما كنسلت شيانج ماي )
أنصح بالسكن في وسط المنطقة المركزية عشان تكون أغلب مراكز التسوق حولك و تقدر تروح لها مشي بدل التكاسي عشان الزحمة .. الأفضل تخلون بانكوك تسوق فقط

معلومات عامه
– جميع المدن او الجرز اللي ذكرتها فوق فيها نفس الفعاليات بالضبط يعني لا تروح لأكثر من مدينة و تتوقع فيه فعاليات أكثر أو مختلفه
– حسب كلام سائق Bolt في شيانج ماي رتب لي تايلاند كالتالي من الأغلى الى الأرخص:
١- بوكيت ( الأغلى ) لوجود سياح كثير فيها و عشان الجزر
٢- كرابي
٣- بانكوك
٤- شيانج ماي ( الأرخص ) ما أعرف السبب بس فعلاً كانت رخيصه حسب تجربتي حتى مواصلات Bolt اللي اخذتها اغلبها تحت ٨٠ بات رغم بعد المسافة و الأكل كذلك رخيص.
– بعض الفعاليات غاليه و اسعارها مُبالغ فيها.
– بالنسبة للعبايه و الحجاب و النقاب ما فيه اي مشاكل.
– كل المدن و الجزر اللي ذكرتها كانت آمنه حتى المشي في الليل كان آمن بالنسبة لي ما واجهة اي مشكلة.