تقرير نهاية رحلتي في جزيرة بوكيت تايلاند بالتفصيل

نهاية رحلتي ببوكيت الآن متجهة إلى بانكوك، وقررت اكتب لكم خُلاصة تجربتي من وإلى وكل ما كنت اتمنى اعرفه قبل أجي تايلند – بوكيت 🤍

▫️اولاً معلومات مهمة:
١. فلوسك بالدولار دائمًا وابدًا بكل الدول، يفرق معك بالصرف، الدولار = ٣٤ بات تقريبًا وكسور = ٩ بات للريال الواحد
٢. اصرف شيء بسيط جدًا بالمطار، باقي الصرف من برا لاحظت أنه اعلى
٣. السكن باتونغ ممتازة جدًا وأمان ومليانه عرب وعادي منقبين ومحجبات، اموركم تمام التمام، وقريب من كل شيء
٤. إذا جاي تحلل الفعاليات احجز السكن عن طريق Airbnb لأن كل وقتك برا، بتلقى شقق نظيفة وقريبة لكل شيء واسعارها يابلاش، وأفضل من باقي التطبيقات المشهورة تدفع مبلغ فلكي وبالأخير خدمات سيئة ومكان ضيق، سكنت في https://maps.app.goo.gl/2U4GPmycw4EXnmuw6?g_st=ic جنب فندق Heritage فالأماكن عالي والمكان نظيف ومرتب وراهي يشرح الصدر، عن نفسي ما احب اسكن بالغرف الفندقية احسها ضيقة وسعر الليلة تقريبًا 250 ريال، وكل شيء جنبك توصل على رجلينك، مطاعم ومول وكوفيهات والباتونق بيتش.

٥. احرص كل الحرص على المطاعم الحلال، وكل شيء حلال
٦. فعل وضعية ماما نورة بالمكاسر، كاسسسسسر لأخر رمق، يشوفونك سائح يحطون رقم فلكي، حاول قدر المستطاع وبتفوز عليهم، لا تدفع اول رقم يعطونك، لو توصل ربعه بيوافقون
٧. فيزا سفر من الراجحي بتفيدك جدًا في انتظار المطارات، خصوصًا إن رحلات تايلند غالبًا ترانزيت وتعب، تكلفتها اول سنة مجانًا بعدين كل سنة 150 ريال، تدخلك 7 مرات اللاونجات في السنة، اهم شيء استخدمها قبل تسافر باسبوعين واصرف 15$، واذا وقت الترانزيت عالي يمديك تأخذ غرفة بنفس اللاونج للنوم مجانًا تبع البطاقة

٩. المواصلات Bolt فقط، رخيص وحلو

ثانيًا الفعاليات |
اليوم الأول: وصلنا تقريبًا الظهر دخلنا الفندق ومباشرة انطلقنا على الباتونغ بيتش مسافة 5 د مشي، وركبنا البارشوت شخصين 2500 بات، كان 4500 بات لكن كاسرنا لآخر رمق وكانت تجربة ممتعة جداً وجلسنا إلى الغروب

ثاني يوم: رحلة جيمس بوند قارب كبير، قالوا 3500 بات لكن كاسرنا إلى 1500 بات، ويمديكم اقل – جمييييييلة جدًا جدًا جداً خصوصًا إذا الشركة كويسة بتستمتع، تتضمن مواصلات من الفندق للفندق، فطور خفيف – قهوة وشاي وسناكات – غداء – فاكهة بعد الغداء، وانتبهوا للوقت اللي يقولون لكم بيأخذونكم فيه لأنهم ممكن يسحبون عليكم لو تأخرتوا، ناموا كويس لأن مدتها عالية 10 ساعات تقريبًا

اليوم الثالث: حجزنا تجربة الزيب لاين مع شركة Hanuman World اخذنا اعلى فئة 3450 بات تقريبًا الشخص، تتضمن المواصلات والغداء والفعاليات، جميييييييلة جميييييييلة جميييييلة لابُد تجربونها، ممتعة لأبعد حد والسعر معقول، 350 ريال تتضمن 19 زيب لاين، انا بالرياض ركبت واحد بس بـ 150 ريال، واضفنا الوالدة معنا بالمواصلات والغداء بـ 350 بات

اليوم الرابع: كان مفترض يوم الراحة ويوم اللاشيء، بننزل للاولد تاون ولمطل ستاربكس، لكن بطريقنا لقينا Phuket Kart Speedway وطبعًا لازم نجرب، بتلقون 2 قريبين لبعض، واحد على الشارع العام وواحد داخل شوي، روحوا للي داخل افضل واكبر واسرع، اخذنا اللعبة بـ 800 بات للشخص، ربع ساعة، كانت ممتعة وسسسسسريعة لا تفوتكم! ومنها كملنا للاولد تاون، ما اعجبتنا، ثم اتجهنا مطل ستاربكس، تعالوا بدري شوي إذا تبون تحضرون الغروب، لأنهم يقفلون الاستقبال بدري حدود 5:30 مساءً بس دخلنا بواسطة الوالدة 🤣🤍🤍

اليوم الخامس: المدينة المائية Andamanda Phuket تفتح الساعة 10 صباحًا إلى 6 مساءً، تذكرتها من عندهم 1500 بات أنا اخذتها من كشك بـ 1200 بات، ممتعة جدًا لا تفوتكم وفيه عندهم ملابس محجبات ساترة وطويلة، اخذتها بـ 170 ريال، كبروا الحجم عشان تصير واسعة أنا اخذت 4x وطلعت ممتازة جدًا طويلة وواسعة، تعالوا بدري لأن الألعاب تأخذ وقت وعشان يمديكم تجربون كل شيء أكثر من مرة، استخدموا تطبيق Traveloka عشان تقارنون الأسعار وتورونها صاحب الكشك

اليوم السادس: الرافتنق، كلفتنا 1500 بات للشخص، اخخ الرافتنق وما ادراك ما الرافتنق ممتع ممتع ممتع جدًا كله ضحك، مشواره طويل ساعتين ونص إلى 3 ساعات لأن المخيم خارج بوكيت قريب كرابي، لذلك ناموا كويس، فعالياته كانت: تجديف 5 كيلو، وكله ضحك، واضافةً الكيلوات بفلوس – بعدها الشلال 30 د – بعدها الدبابات 30 د وسط الغابة والأمان فيها عالي لأن قدامك مدرب ووراك مدرب ما يمدي تسرع وتطير – بعدها ركوب الفيلة 15 د – بعدها القردة والأكيد تتضمن الغداء

اليوم السابع: جزيرة بي بي ايلاند، كانت خيار جانبي اذا كفانا الوقت كان بها او اكتفينا بجيمس بوند، اخذنا فيها قارب سريع ك تغيير عن رحلة جيمس بوند، كلفتنا 1800 بات، لكن الشركة اللي كنا معها جبارة الصراحة من كل النواحي، افضل فطور وافضل غداء كان عندهم، اللي يخاف من البحر او عنده دوار بحار ممكن ما يناسبه القارب السريع لانه فعلًا سريع وكل الوقت مطبات بحرية تحس إنك بتطيييير، وصلنا إلى بي بي ايلاند، الفرق عن جيمس بوند ان الماء هنا نظييييييف، لكن فعاليات جيمس بوند امتع، سبحنا مدة 30 د وفيه إيجار مراكب خشبية، بعدها اتجهنا لجزيرة مايا 30 د، بعدها الغداء ومدة ساعة يمديك تصلي وتأخذ شاور – بعدها الغوص مع السمك – واخر جزيرة فيها جت سكي إيجار اخذناه بـ 1200 بات مدة 25 د وكان ممتع جدًا لا يفوتكم بس انتبهوا لا يجدعكم زيي 🤣🤍🤍

بالنسبة للتكاليف انا جايه مع الوالدة 60 سنة “ناسبتها اغلب الفعاليات ما عدا البارشوت والزيب لاين والسيارات” واخوي حسبنا امس تكاليف بوكيت لكل شخص شاملة الطيران والفنادق والأكل والشرب والكوفيهات والمشتريات الجانبية والفعاليات كلها تقريبًا كل شخص 6000 ريال شاملة برضو الطيران الداخلي لبانكوك، لأن رحلتنا من “الرياض – بوكيت – بانكوك – الرياض” الترانزيت الأول مسقط 6 ساعات والثاني أبو ظبي 1 ساعة

الخلاصة: اللي متردد يجي تايلند لا يتردد ابدًا ديرة التسبيح والتفكر، تتفكر بعظمة الخالق، ومستحيييييل الصور تعكس الجمال، اختاروا الوقت الصح والناس الصح والفعاليات الصح وفالكم السعد، والحمدلله حمدًا كثيرًا طيبًا مباركًا فيه