تقرير للي ناوي يروح تايلند ( بوكيت – بانكوك )

تقرير بسيط للي ناوي يروح تايلند ( بوكيت – بانكوك ) ..

الطيران :

حجزنا على شركة الطيران الإماراتية كان ممتازًا ، ولكن يحدث بعض التأخير في رحلات الطيران الداخلية على طيران آسيا. يُرجى الانتباه إلى الحد الأقصى للوزن المسموح به في الطيران الداخلي، وكذلك تجنب إحضار بطارية تزيد قدرتها عن 10,000 مللي أمبير بعض الخطوط الاسيوية تسمح حتة 20 الف أمبير  و أيضا عدم حمل عطور تتجاوز 100 مل داخل الطائرة.

السكن :

جزيرة بوكيت :
طبعًا السكن مربوط بالفعاليات فاذا عندك فعالية فمن غير المنطقي انك تاخذ فيلا ومسبح لانك من 8 صباحاُ تطلع و ما ترجع للفندق الا اخر العصر ..

• أيام الفعاليات احجز في فندق غرفه مع إفطار انا اخذت في فندق crest غرفة مع إفطار 3 ليالي اللي هي قضيتها بالفعاليات واخذت بعدها ليلة بنفس الفندق بس اخذت الفيلا روعه و تستاهل قيمتها 👍🏻..
  
• بولمان كذلك بطل ويستأهل بس بعيد .
  
• ذا ناي هارن خيااااالي وبعيد مره يبغى له تروح ومتطلع من المنتجع يس يفتح النفس .
• اماتارا المنتجع جميل بس عيبه الخصوصيه للمسبح وميزته سعره . كل المنتجعات اللي ذكرت تاخذها بعد الفعاليات افضل لانها بعيده وكبيره تقضي يومك بالمنتجع .

الفندق الاول : crest

 

 

العاصمة بانكوك :
⁃ احجز اقرب الفنادق لمول سيام براغون او مول بلاتينيوم او مول Mbk لأنها زحمه وتتأخر بالتنقل انا حجزت في جراند سنتر بوينت ريتشارد شقق فندقيه حلوه مره سعره مو رخيص يس تستاهل قريبه من المولات ونظيفة عيبهم فطورهم ما هو حلال.

رابط الفندق على موقع بوكينق :

فندق جراند سنتر بوينت راتشادامري في بانكوك

الفعاليات و الأماكن :

جزيرة بوكيت :

• فعالية phi phi ياخذونك من الفندق الساعة 8 ويرجعونك 5 يمرون بك على 7 مراحل الحقيقة انها متعه بصرية ماشافتها عيني ( خرافي ) وللعوائل الأكثر من 5-6 ياخذون لهم بوت خاص فيهم للخصوصية . طبعا تأخذ التذكرة من شاطئ الباتونق الكشكات اللي على الشاطئ سعر التذكرة 1300-1400 بات والبوت الخاص ثاني .
• فعالية سفاري وهي كذلك مراحل أهمها ركوب الفيلة والزبلاين والرافتينج رحله جميلة جدًا كذلك تحجزها بالباتونق .
• فعالية جيمس بوند اشوف ما تسوى . لان phi phi افضل منها ،
• الزبلاين فيه 3 أماكن كلها من الباتونق حجزها : اللي هو الطائر هانومان سعره لوحده 2500 – 3000 بات .
• وفيه الزبلاين اللي مع السفاري اذا بتاخذه لوحده نص ساعه ب800 بات ( انصح فيه ) .
• ( المدينة القديمة في بوكيت ) مقاهي سنعه مثل :
  • Roof اسبريسو وكريمه كراميل .
  • Phuketique ألذ فرنس توست
  • Raga coffee

العاصمة بانكوك :
بالنسبة لي بانكوك مقضيها تسوّق ما بين هذي المولات  :

• مول بلاتينيوم .
• مول سيام براغون .
• مول سيام ايكون جديد وحلو مرره .
• مول mbk

كل مول بضاعته تختلف وانت شف اللي يناسبك .

 

المطاعم والكافيات الحلال :

جزيرة بوكيت :

• سلطان جريل بالباتونق 10/10
• مطعم تندوري الهندي في الباتونق 9/10
• مطعم efe التركي في المدينه القديمه 9/10
• مطعم the zula بالباتونق .
• مطعم برايم برجر 8/10
• كوشك برجر امينه بالباتونق تفتح بعد المغرب

العاصمة بانكوك :

• مطعم alsaray حلو 9/10 لبناني هندي
• مطعم امريتسر الهندي
• مطعم شاركول الهندي
• برايم برجر اكثر من فرغ
• بيروت اللبناني

التنقل :
اذا تبي تستخدم التاكسي فأنت ضايع وتبي تخسر فلوسك فرررررق عن بولت 50٪ استخدم تطبيق بولت او تطبيق قراب وماراح تندم فيه اي مكان في تايلند 👍🏻..

⁃ اذا وجهتك بانكوك تسوّق لمول بلاتينيوم وmbk خذ معك للمول شنطتك لانك تبي تشتري وتكثر لأنه رخيص مره مره واحسب حساب الوزن .
⁃ عدد الأيام اللي اشوفها مناسبة لتايلند اقل شيء 10 أيام .

الصرف الفلوس :
افضل طريقة تجيب معك من السعودية دولار كاش  وتصرفه للبات التايلندي
في بوكيت الباتونق و عندك المحل اللي بالزاوية بأول شارع بنقلا مقابل الشاطئ حلو ،
وفي بانكوك كثيره الأماكن مره والأفضل تحت مول بلاتينيوم بس مزحوم .

يعتمدون على الكاش كثير، وخذ معك الفيزا سواء الراجحي السفر او الاستثمار .

طبعًا هذا كله من خلال تجربتي يمكن اصبت في شيء او فيه خيار ممكن افضل ببعض الأشياء فعليك البحث والله يسعدكم ويحفظكم 🌹.