تقارير المسافرين السعودية

تقديم تصريح سفر في السعودية

نقل لكم تجربتي بالتفصيل الممل عشان اللي وده

قدمت على تصريح السفر اليدوي بتاريخ ٦ محرم وصدرت المعاملة بتاريخ الصادر ٨ محرم
بعدها طلعت خدمة ابشر
قدمت عليها يوم الخميس ١٥ محرم بالليل ووصلتني الموافقة ثاني يوم ١٦ محرم العصر
ارفقت القبول وقرار الابتعاث وبطاقة العائلة وكتبت سبب حاجتي للرجوع وهو استكمال دراستي وانهاء المتطلبات
طلبت التذكرة وبعد الموافقة سويت حجز تذكرة
تواصلت مع الخطوط وحجزوا لي على المسار:
الدمام – جدة – لندن – مانشستر
لكن الرحلة ما تناسبنا لأسباب كثيرة
فكلمنا خدمات ما بعد البيع وكنسلنا التذكرة كاملة واخبرونا انها تظل رصيد لنا للاستخدام خلال ٣ سنوات

حجزنا على حسابنا الخاص على KLM (الخطوط الهولندية) اللي تعتبر الخيار الامثل من ناحية المدة لاهل الشرقية
المسار: الدمام – امستردام ترانزيت ساعة وعشر دقايق – ليدز

رحلتنا الساعة ٢:٣٠ صباحا
وصلنا المطار ١٠ المساء

ملاحظات:
١- المطار اغلب المسافرين اللي فيه اجانب .
٢- المطاعم والكافيهات اغلبها ان لم تكن كلها مقفلة .
قبل التفتيش شفنا تيم هورتنز اظن اظن فاتح(ما قربنا منه كثير) – ستاربكس مقفل سواء قبل او بعد- بعد التفتيش فقط مطعم بوبايز اللي فاتح وفقط نوع وجبة واحد عندهم متاح يعني قهوة ما قهوة انسى .

ملاحظة مهمة: شفت الناس جايبين معهم قهوة من برا المطار وعادي عند تفتيش شنط الطيارة carry on ما خلوهم يرمونها زي المعتاد! واحنا كان معنا بالشنطة قارورة موية وعلبة عصير ومشونا فيها عادي! يمكن عشان الكافيهات مقفلة؟ مادري صراحة بس قالت لي المفتشة عادي .

المهم نرجع لموضوع السفر :
ما طولنا عند الكاونتر وحليلين ومتعاونين الموظفين كانو الله يسعدهم ما يدققون على كيلو ولا اثنين
معنا ٣ شنط والمفروض التوتال ٦٩ (٢٣*٣) لكن كان المجموع ٧٥ وما قال شي

اخذنا البوردينق وتوجهنا للجوازات قال اللي عالكاونتر سعوديين؟ روحو عند الضابط (مكتب على اليمين)
رحنا وما كان فيه سعوديين غيرنا وقتها وقال الضابط (ابو نجمتين) يدوي ولا ابشر؟ قلت له ابشر وطلب ارقام الهويات عشان يشيك
نبهته ان فقط المبتعث انا واللي معي زوج والمتبعث فقط اللي استخرج التصريح لانه يشمل الزوج
بس ما طق خبر
شيك ورجع لنا قال انت مالك تصريح بالسستم فقط المبتعث .. لازم تطلب تصريح لنفسك من ابشر حقك لمرافقة المبتعث!
قعدنا معه شوي شد ومد قال ماقدر انا اطلع احد ما معه تصريح واضح مسؤولية ومدري ايش
بعدين نادى واحد ثاني شكله اكشخ شوي (تاج) وشرح له السالفة وذا بعد حاول يقنعنا انه المفروض يطلب تصريح له لحاله من ابشر حقه وريناه رد الجوازات في ابشر على الطلب وقلنا له الاستثناء يقول الطالب المبتعث والزوج/الزوجة/ الاطفال
قال كبشروا طلبكم في ابشر مع الرد وارسلوها على جوالي واتساب
وراح يحوس شوي يكلم ويرسل فويس وواضح قاعد يستشير احد بالموضوع 😟
بعدين رجع ومن بعيد أشر لنا انه اوكي 👍🏻😁
يوم قرب قال لانه زوج/زوجة/اطفال فقط
لو اب او اخ او ام لازم كل احد يطلب تصريح خاص فيه من ابشر

عدت سلامات الحمدلله وخلصنا سريع
السوق الحرة مفتوحة

وصلنا عند البوابة قبل ١٢ واقلعنا عالوقت الحمدلله
الطيارة فل مافي تباعد والاغلب اجانب
والطيارة برررررررد موت جيبو معكم جاكيت
وزعو اول شي علبة موية ٥٠٠ ما لكل شخص
بعدها يقدمون وجبة عشاء ساخنة (رز اصفر مع ايدام خضار) وسلطة وحلى وموية صغيرة
وبعدها وزعو كيس محكم الاغلاق فيه ٣ علب موية صغيرة – كتكات ابو اصبعين – حبة مفن – حبة كوكيز – قطعة حلى بعد – وحبة افندي
اللي لفت نظري وهم يوزعون العشاء فيه كحول ضمن المشروبات!
كنت اظن الطيران الاجنبي اللي يقلع من السعودية مافيه! توني ادري 😅

المهم
وصلنا الحمدلله امستردام قبل الوقت المحدد
والنزول من الطيارة صف صف

ملاحظة: سوينا الفحص احتياط قبل السفر بيوم لكن محد طلبه لا خطوط الطيران ولا المطارات

مطار امستردام ستاربكس والكافيهات والمطاعم واغلب المحلات فاتحة 👍🏻

وسلامتكم

 

رابط طلب التصريح من موقع أبشر 

اترك رد

زر الذهاب إلى الأعلى
error: نعتذر لك لايمكنك النسخ !!